Графички приказ на капиталните расходи во Буџетот. Фото: Веб страница на Мин. за финансии
Графички приказ на капиталните расходи во Буџетот. Фото: Веб страница на Мин. за финансии

АНАЛИЗА: За кои капитални инвестиции ќе има пари и колку?

Графички приказ на капиталните расходи во Буџетот. Фото: Веб страница на Мин. за финансии
Графички приказ на капиталните расходи во Буџетот. Фото: Веб страница на Мин. за финансии

На хартија, повторно, за идната година е проектирано едно од највисоките нивоа на капитални расходи – буџетска ставка кој го профилира развојниот концепт на економските политики – пишува неделната економска анализа на Portalb.mk 

 

ПишуваАнета Додевска

Со Буџетот за 2018 година, на кој  за прв пат потпис стави сегашната Влада, предвидено е ниво на капитални трошења од 400,7 милиони евра, што во однос на годинава претставува раст за 20,3 милиони евра или за 5,3%. Дел од веќе започнатите инфраструктурни проекти продолжуваат и во следната 2018 година.

Капиталните инвестиции планирани на ниво од 24.645 милиони денари, се наменети за интензивирање на инфраструктурните проекти, односно за инвестициски вложувања за довршување на  автопатот на Коридор X и железничката инфраструктура, енергетската и комунална инфраструктура, како и капитални инвестиции за подобрување на условите во здравствениот, образовниот и социјалниот систем, земјоделството, културата, спортот, заштитата на животната средина  и правосудството – наведува креаторот на економските политики.

 

Ќе има пари за плажи. гасификација, плоштад Скендер Бег, училишта…

 Преку Развоен дел на Буџетот за периодот 2018-2020 година, Владата преку буџетскиот документ ги обелодени плановите каде и во кои развојни прокети планира да троши пари. “Порталб“, детално ги обработува развојните програми опфатени преку министерствата.

Така, преку Службата за општи и заеднични работи на Владата, догодина за реализација на  активности поврзани со вршење на градежни работи и реконструкции во објекти на Владата, ќе се потрошат нешто повеќе  од половина милион евра, а во буџетската 2019 година,  оваа сума незначително ќе се намали за околу 80 000 евра.

За осовременување, техничко доопремување и функционално поврзување на комуникациско-информатичките системи, односно за модернизација на Министерството за одбрана, преку развојната програма  догодина планирано е да се потрошат 310.000 евра. Во новиот Буџет преживеа и проектот „АРМ мој вистински дом“, што го воведе претходната Владата, па така за овој проект и за реконструкција и адаптација на дотраените објекти и инсталации на АРМ, планирани се средства во висина од 570.000 евра а  во 2019 година износот треба да се зголеми на 620.000 евра. Најголема сума е планирана за “Интеграција во НАТО“, во износ од 15,2 милиони евра а со Буџетот за 2019 сумата треба да достигне 16,5 милиони евра.

Кај Министерството за внатрешни работи, конкретно за реформи во полицијата кои подразбираат креирање на современа полиција, согласно ЕУ стандардите, одржување на поволна безбедносна состојба, спроведување на владеење на правото согласно националното законодавство, вклопување во регулативите и стандардите на ЕУ во сите аспекти на полициското работење, планирани се пари во износ од 8,6 милиони евра а во 2019 година оваа сума треба да се зголеми за повеќе од три милиони евра и да достигне 12,0 милиони евра.

За поддршка на развојот на мали и средни претпријатија, преку развојната програма на Министерството за економија, догодина планирана е сума од 630.000 евра. За изработка на проектна документација и градба на основна внатрешна и надворешна сообраќајна и техничка инфраструктура, водоводна мрежа, канализација, изградба на електротехничка инфраструктура, како и инфраструктурно доуредување на постоечките зони во ТИРЗ Скопје 1, ТИРЗ Скопје 2, ТИРЗ Штип, ТИРЗ Тетово, ТИРЗ Прилеп, ТИРЗ Струга и ТИРЗ Струмица, преку Дирекција за технолошки индустриски развојни зони планирани се средства во износ од 7.000 000 евра.

Догодина, треба да финализира и изградбата на Управна зграда на Министерството за транспорт, за што ќе се потрошат половина милион евра, а преку истото министерство за изградба на социјални станови планиран е износ од 5,4 милиони евра, Сумата за изградба на социјални станови во 2019 година треба да се зголеми на 6,2 милиони евра, додека во буџетската 2020 година не се испланирани средства за оваа намена.

За гасификација, клучниот проект кој беше во изборната програма на СДСМ, догодина со новиот Буџет ќе се одвојат 36,3 милиони евра. Во Буџетот за 2018 г. преживеа и Жичарата, со што за продолжување на изградбата се планирани средства во износ од 813. 000 евра, а во 2019 година оваа сума е двојно зголемена, на скоро 2 милиони евра. Во новиот Буџет ќе има пари и за  изградба на плажи во Дојран, Преспа и Охрид, за што се планирани близу 500.000 евра, а исто толкава сума е најавена и за буџетската 2019 година.

Во Буџетот за 2018 година, повторно е најавено решение за индустриската зона Визбегово, каде бизнисмените, но и граѓаните,  се соочуваат со проблеми поради отсуство на елементрана инфраструктура. До година за водовод и канализација во индустриска зона Визбегово ќе се одвојат 325.000 евра.

Преку Министерство за образование, милионски суми ќе се одвојат за инвестиции во образование, Така, за изградба на основни училишта планирана е сума од 2,6 милиони евра и уште 800.000 евра за реконструкција на основни училишта. Дополнителни 4 милиони евра се планирани за изградба на спортски сали во основните училишта. За изградба на средни училишта се одвоени 650.400 евра и уште 500.000 евра за реконструкција, додека за изградба на спортски сали во средните училишта ќе се одвојат 1,1 милион евра. За реконструкција на училишни домови планирани се уште 500.000 евра, а за изградба и реконструкција на студентски домови со Буџетот за 2018 се одвојуваат 4,4 милиони евра.

 

Ќе се гради и нов Клинички во Скопје

Преку Министерството за здравство, за реконструкција на Општата болница во Кичево одвоени се 1,1 милион евра а за изградба на нов клинички центар во Скопје и Штип, во 2018 година ќе се потрошат 20,3 милиони евра,

Преку Министерството за локална самоуправа, а за реализација на веќе започнатиот проект Скендер Бег, одвоена е сума од 2 милиони евра, со што овој проект треба да финишира догодина, со оглед на тоа што за оваа намена не се предвидени пари во буџетската 2019 и 2020 година.

За реконструкција и доизградба на 4 прeчистителни станици и канализациони системи во 8 населени места во општина Маврово и Ростуше, преку Бирото за регионален развој, одвоени се средства во износ од 850.000 евра.

Буџетот за 2018 година влезе во собраниска процедура, а прв филтер е Комисијата за финансирање и буџет, во која ќе бидат изнесени и амандманите на пратениците во однос на предложениот Буџет.

 

 

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED – National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, National Endowment for Democracy, The Balkan Trust for Democracy, проект на Германскиот Маршалов фонд на САД, или нивните партнери.

Check Also

Фото: portalb.mk

АНАЛИЗА: 140 милиони евра во рацете на пет министри-Aлбанци !

Едно до најмоќните министерства, кое располага со буџет поголем од 100 милиони евра останува во …

Leave a Reply

Your email address will not be published. Required fields are marked *